МҮОХ-ны тэргүүн дээд шагнал гардуулах “Бөртэ чоно 2023” ёслолын арга хэмжээ боллоо
21 дэх жилдээ тус арга хэмжээ ёслол төгөлдөр болж, Спортын салбарын шилдгүүдээ тодрууллаа.
БӨРТЭ ЧОНО 2023 оны шилдэг тодруулах арга хэмжээний СПОРТЫН ШИЛДЭГ БҮТЭЭН БАЙГУУЛАЛТ – “AIRDOM” ТӨСӨЛ /МОНГОЛЫН ХӨЛБӨМБӨГИЙН ХОЛБОО/ шалгарлаа, Шагналыг Монголын Хөлбөмбөгийн Холбооны Ерөнхийлөгч М.Болд, Хөлбөмбөгийн бэлтгэлийн төвийн захирал Ш.Отгон-Өлзий нар гардан авлаа.
МОНГОЛЫН ХӨЛБӨМБӨГИЙН БЭЛТГЭЛИЙН ТӨВИЙН ТАНИЛЦУУЛГЫГ ТА БҮХЭНД ХУВААЛЦАЖ БАЙНА.
Хаяг:Төв аймаг, Сэргэлэн сум, 4-р баг, Баруун Дэлгэрийн ам
Монголын Хөлбөмбөгийн Бэлтгэлийн төв нь Төв аймаг, Сэргэлэн сум, 4-р баг, Баруун Дэлгэрийн аманд байрлах 5000мкв бүхий өөрийн эзэмшлийн газартаа 1000 мкв бүхий 2 давхар барилгыг барьж халаалт, хэрэглээний халуун усыг 100 хувь байгальд ээлтэй байдлаар шийдвэрлэн 2021 оны 6-р сард ашиглалтанд оруулсан. Тус бүтээн байгуулалт нь Азийн хөлбөмбөгийн холбоо /AFC/ болон Олон Улсын Хөлбөмбөгийн Холбооны /FIFA/ санхүүжилтээр баригдсан бөгөөд Монголын хөлбөмбөгийн ирээдүйд чухал хувь нэмэрээ оруулсан бодит бүтээн байгуулалт болсон.
Бид нэг удаадаа 70 хүртэлх хүнийг хүлээн авах хүчин чадал бүхий 11 өрөө, 70 ортой. Бидний алсын хараа тамирчдыг дэмжих тэдэнд ая тухтай орчин нөхцөлийг бүрдүүлэхэд орших ба үүнтэй уялдуулан дотоод тохижилтыг тамирчдад зориулан кемп хэв маягаар тохижуулж өгсөн. Өрөөний зохион байгуулалтын хувьд нэг өрөөндөө 3-8 хүртэлх тооны хүн нэг дор байрлах боломжтой. Энэ нь тамирчдад нэг баг, нэг зорилгоо мэдрэх, бие биенээсээ суралцах, илүү дотно танилцах боломжийг олгож байгаагаараа илүү давуу талтай. Өрөө бүр дотроо халуун хүйтэн ус бүхий шүршүүр, 00, гар угаагууртай.
Бэлтгэлийн төвийн нэг давхарт нийт 116 мкв талбай бүхий ресторан нь нэгэн зэрэг 70 хүртэлх хүнийг хүлээн авч Ази, Европ, Монгол амт чанартай хоолоор үйлчилж байна. Гал тогооны хоол боловсруулах хэсгийг хамгийн сүүлийн үеийн дэвшилтэт технологи бүхий тоног төхөөрөмжөөр тохижуулж хоол үйлдвэрлэлийн стандартад 100% нийцүүлэн ажиллаж байна.
Хэрэглэгч, үйлчлүүлэгчиддээ хэрэгцээт үйлчилгээг нэг дороос авах боломжийг олгон амралт, сургалт, уулзалтуудыг хослуулах боломжийг олгож байна. Үйлчилгээний төвийн нэгдүгээр давхарт байрлах сургалтын зааландаа бид 30 хүртэлх хүнийг хүлээн авах боломжтой бөгөөд, Хоёрдугаар давхарт байрлах уулзалтын өрөөнд 10 хүртэлх хүнийг хамарсан хурал хийх боломжтой.
Хөлбөмбөгийн талбай буюу Эйрдом
FIFA FORWARD төслийн хүрээнд 2023 оны 1-р сард “Эйрдом” буюу агаараар хийлэгддэг битүү дээвэртэй спорт байгууламжийг ашиглалтанд оруулсан. Жилийн 4 улирал ашиглах боломжтой байгууламж нь 120м урт, 80м өргөн, 27,5м өндөр бөгөөд 250 үзэгчийн суудалтай. Хөлбөмбөгийн тэмцээн, шигшээ багуудын бэлтгэл, олныг хамарсан эвент арга хэмжээ, спортын бусад тэмцээн уралдаануудыг зохион байгуулах боломжтой.
